مجموعة الانفلونزا !!!!!!!!!!!!!!!!!!!!

بسم الله الرحمن الرحيم

مجموعة الانفلونزا

يمكن يكون معظمنا سمع عنها , كام برشامه كده تاخدهم وقال ايه البرد هيروح ,ولا انت عارف مصدرهم ايه ولا عارف ايه حتى علاقتهم بالانفلونزا
تعالوا احنا نشوف حكاية المجموعه دى ايه


طب الفكرة أصلا جت منين ...
بالتأكيد واحد عبقرى اللى قعد يألفها ...
لقى عنده شوية أدوية مش بتتباع و قربت تبقى إكسبير و يمكن تكون فعلا إكسبير
لا و كمان هتجيبله شوية فلوس من الهوا ...

طب نعمل إيه ... نجيب شوية إقراص مع بعض و نسميها مجموعة إنفلونزا ... أو برد
هى الناس فاهمة حاجة ...
كل واحد داخل الصيدلية يقولك أنا عندى إنفلونزا و ميعرفوش إن اللى عندهم شوية برد و إن الإنفلونزا أخطر و أصعب منها و قد تكون مميته لو الدور كان جاااامد

تانى حاجة ... إن البرد اللى عندهم زى ماحنا عارفين بسبب فيروس و ليس بكتيريا
و ده معنى إن قرص المضاد الحيوى مالوش أى لازمة نهائيا بل بالعكس لو فى عدوى بكتيرية لازم المضاد الحيوى يتاخد كورس كامل و إلا إنت كده بتساعد إن يحصل resistance

طب إيه العلاج المناسب للبرد ...
العلاج هو الراحة التامة بالسرير و البرد من نفسه هيروح فى خلال 3 أو 4 أيام بالكتير (self limited)
و هنا ناخد بالنا من نقطة ان جزء كبير من العلاج بيكون الحاله النفسيه !!!!

العامل النفسى على عينى وعلى راسى ... بس كده كده إحنا عارفين إن البرد هيروح من نفسه لو المريض مخدش حاجة


طب و إدوية البرد اللى فى الصيدلية ... دى كلها بتعالج الأعراض بتاعة البرد و ليس السبب
يعنى أنا بخدها عشان الأعراض دى متضايقنيش
مسكن عام + مضاد للإحتقان + مضاد للحساسية
و دول كلهم أو أخر إتنين بيبقوا موجودين فى اقراص البرد العادية الموجودة بالصيدلية
يبقى أنا يكفينى إنى اخد الأقراص دى و خلاص لحد ما البرد يروح

طب مجموعة الإنفلونزا ناقصها إيه ...
قرص المضاد الحيوى زى ماتكلمنا عليه إنه جريمة
و ممكن كمان فيتامين سى ...
أوك فيتامين سى مش بيعالج البرد لكن قد يقلل من ال severity بتاعته

دلوقتى شريط البرد فيه عشر أقراص و يكفينى 3 أيام و ب 2 جنيه مثلا
بينما المجموعة زى ماقولتوا بجنيه و فى بجنيه و نص و بيتاخد مرة واحدة ... يعنى المفروض طبيا إنك تروح تجيب منها مرتين أو تلاتة يوميا عشان الأعراض تقل لحد ما البرد مايروح

المجموعة بها قرص مضاد حيوى ... لا يفيد وقد يؤدى إلى حدوث مشاكل
أقراص البرد لا تحتوى على مضاد حيوى

شريط البرد مغلق و مدون عليه تاريخ للصلاحية
المجموعة كيس يتم تعبئته بواسطة عامل الصيدلية و طبعا متسألنيش عن تاريخ الصلاحية إنت و حظك

أخيراً نرجع لنقطة مهمة قووووى
إحنا كصيادلة واقفين فى الصيدليات المفروض إننا أكتر ناس مثقفة فى الشارع
يعنى المفروض إنك منارة لبقية الناس خاصة الناس الجاهلة اللى مش فاهمة حاجة

هل يا ترى هتمشوا مع التيار و تعملوا حاجة زى كده و لا لأ هتقولوا ستوووووب و تفهم المريض و تثقفه
أنا أعرف دكتور كان مش موافق على الحكاية دى خالص فى الصيدلية بتاعته بس من كتر زن الناس بقى بيبيع مجموعة الإنفلونزا
هل هتبقوا زيه و لا ....
يا جماعة إحنا تقريبا المجال الوحيد اللى كل الناس بتفتى فيه سواء بعلم و لا من غير علم
عمرك شفت حد بيتكلم عن بناء و عن تشييد إلا وكان مهندسا
أو عن بعض الثغرات فى القوانين إلا و كان محاميا
إنما الطب ... كلوا يتكلم

ده مرة واحد دخل الصيدليه بيقول الدكتور ... (الدكتور كان قال له قبل كده إن مفيش حاجة إسمها مجموعة إنفلونزا)
إنا لقيت مجموعة الإنفلونزا عند الصيدلية اللى جنبكوا ... إنتوا متجيبوهاش ليه ؟؟؟ إبقى هاتها يا دكتور
تخيلوا الجهل خلى اللى ماشى صح مقصر و الفهلوى شاطر !!!